نمونیا اور ہیضہ کے کیسز میں اضافہ کے سبب سیکرٹری صحت بلوچستان ٹیم سمیت گوادر پہنچ گئے
گوادر میں سیلاب کے بعد وبائی امراض میں اضافہ ہوگیا ۔سیکرٹری صحت بلوچستان ٹیم سمیت گوادر پہنچ گئے ۔
بلوچستان کے آفت زدہ شہر میں بارشوں کا پانی جمع ہونے کی وجہ سے نمونیا، ملیریا اور ہیضہ کے امراض پھیلنے لگے ۔ ایم ایس سول اسپتال گوادر ڈاکٹر حفیظ کے مطابق گوادر میں نمونیا اور ہیضہ کے کیسز میں اضافہ ہوا ہے ۔ ان کا کہنا ہے کہ روزانہ دس سے پندرہ کیسز آرہے ہیں ۔ گوادر کے باسی آلودہ پانی پینے کی وجہ سے بیمار ہورہے ہیں ۔
دوسری جانب چیف سیکرٹری کی ہدایت پر سیکرٹری محکمہ صحت عبداللہ خان ڈی جی ہیلتھ اور موذی امراض کی تشخیص کے ماہر ٹیم کے ہمراہ گوادر پہنچ گئے۔ محکمہ صحت نے سیکریٹری کو بریفنگ دیتے ہوئے بتایاکہ بارش اور سیلابی صورتحال ملیریا، ڈینگی اور دیگر موذی امراض پھیلنے کا خدشہ ہے ۔
انہوں نے بتایا کہ اس لیے گوادر میں اکاون ٹیسٹنگ سینٹر قائم کردیئے گئے ہیں۔ گھروں میں موجود پانی سے موذی امراض کے پھیلاؤ کو مدنظر رکھتے ہوئے تمام تر اقدامات مکمل ہوچکے ہیں۔
سیکرٹری صحت نے ہدایت کی کہ پانی سے پھیلنے والی بیماریوں کے روک تھام کےلئے ایمرجنسی پلان پر عملدرآمدکے لیے اقدامات کئے جائیں۔
Source: SamaaTv
